പുരോഗതിയുടെ പ്രയാണം; അധോഗതിയുടെ പരിണാമം

മലയാളം പത്രങ്ങള്‍ സയന്‍സിനെ വളച്ചൊടിച്ചെ അടങ്ങൂ എന്ന മട്ടില്‍ റിപ്പോര്‍ട്ട് ചെയ്യുന്നതില്‍ നിന്നാണ് ഈബ്ലോഗ് തുടങ്ങുന്നത് തന്നെ. ഇഹലോകത്തിന്റെ തുടക്കത്തിലേക്കൊരു മടങ്ങിപ്പോകല്‍ പോലെ തോന്നുന്നു വീണ്ടും മനോരമയെ തിരുത്താന്‍ മുന്നിട്ടിറങ്ങുമ്പോള്‍.

“മനുഷ്യന്‍ നടന്ന പരിണമ വഴി" ഇതാണോ? 2018 ഒക്ടോബര്‍ 8 മലയാള മനോരമ, പഠിപ്പുര പേജിലേക്ക് ഞാന്‍ നിങ്ങളുടെ ശ്രദ്ധ ക്ഷണിക്കുന്നു. അതിനൊപ്പം, പരിണാമത്തിന്റെ എല്ലാവരും അറിഞ്ഞിരിക്കേണ്ട ബാലപാഠങ്ങളിലേക്കും. (ബാലപാഠങ്ങള്‍ മാത്രമറിയാവുന്ന ഒരാളാണ് ഞാനും; വിദഗ്ധര്‍ക്ക് കൂടുതല്‍ കൂട്ടിച്ചേര്‍ക്കാനുണ്ട് എങ്കില്‍ ഞാന്‍ അവര്‍ക്ക് പൂര്‍ണ്ണമായും സ്വാഗതം.)

അതിനുമുന്‍പ് ഒരു ചോദ്യം, പ്രായത്തിന് മൂത്ത ഒരു കസിന്‍ ചേച്ചിയെ/ചേട്ടനെ "നിങ്ങളുടെ പൂര്‍വ്വിക/ന്‍"‍ എന്ന് ആരെങ്കിലും വിശേഷിപ്പിച്ചാല്‍ നിങ്ങള്‍ക്കെന്തുതോന്നും?! അതുപോലെയാണ് നിയാണ്ടര്‍താലുകളെ നമ്മുടെ പൂര്‍വ്വികരായി വിശേഷിപ്പിക്കുന്നത്.¹ പരിണാമവശാല്‍ നമ്മുടെ പൂര്‍വ്വികരല്ല, ഒരു പൊതുപൂര്‍വ്വികനില്‍ നിന്നുണ്ടായ രണ്ട് വിഭാഗങ്ങളാണ് നമ്മളും നിയാണ്ടര്‍ത്താലുകളും.

ഒരു നിയാണ്ടര്‍താല്‍ തലയോട്ടി

ഹോമോ നിയാര്‍ണ്ടര്‍താലെന്‍സിസ് (H. neanderthalensis) എന്നല്ല, ഹോമോ സാപ്പിയന്‍സ് നിയാര്‍ണ്ടര്‍താലെന്‍സിസ് (H. sapiens neanderthalensis) എന്നാണ് ഇവരെ വിശേഷിപ്പിക്കേണ്ടത് എന്ന് വാദിക്കുന്ന ശാസ്ത്രജ്ഞര്‍ വരെയുണ്ട്.² അവര്‍ മറ്റൊരു ജീവിവര്‍ഗമല്ല, (species) മനുഷ്യവര്‍ഗത്തിലെ തന്നെ ഒരു ഉപവര്‍ഗമാണ്.(subspecies) എന്നാണവരുടെ വാദം. ഇത് മാത്രമല്ല, നാം അവരുമായി പ്രത്യുത്പാദനം നടത്തി എന്നതിന് ജനിതകമായ തെളിവുകളുമുണ്ട്!^3,4 അതായത്, “മനുഷ്യന്‍ നടന്ന പരിണാമ വഴി"-യില്‍ ആധുനിക മനുഷ്യന്റെ വശം ചേര്‍ന്ന് നടക്കേണ്ടവരാണ് നിയാണ്ടര്‍താലുകള്‍. അല്ലാതെ പിന്നിലല്ല.

മാത്രമല്ല, പരിണാമം മുന്നോട്ടുള്ളൊരു പ്രയാണമല്ല. ജനിതകമായി ഒറ്റപ്പെടുപോകുന്ന ജീവിവര്‍ഗങ്ങള്‍ അനുകൂലനങ്ങള്‍ വഴി വിഭജിക്കപ്പെട്ടുപോകുന്ന, ഏറ്റവും ലളിതമായിപ്പറഞ്ഞാല്‍ ഒരു മരമായി ചിത്രീകരിക്കാവുന്ന (ഇതിലും തെറ്റുകളൂണ്ട്; സ്പീഷീസുകള്‍ക്കിടയില്‍ നടക്കുന്ന ജനിതക കൈമാറ്റവും സ്പീഷീസുകളുടെ കൂടിച്ചേരലുകളുമടക്കം ഒരുപാട് കാര്യങ്ങള്‍ ഈ ചിത്രത്തെ സങ്കീര്‍ണ്ണമാക്കുന്നുണ്ട്) ഒന്നാണ് പരിണാമചരിത്രം. ജീവികളൂടെ പൊതുപൂര്‍വ്വിക ഈ മരത്തിന്റെ വേരുകളിലെവിടെയോ ഉണ്ടെന്ന്, വ്യതിരിക്തമായ ജീവിവര്‍ഗങ്ങളുടെ സൃഷ്ടി അവശ്യമില്ലെന്ന് മനസില്ലാക്കിത്തരുന്ന ഒരു ചിത്രം.

സോഴ്സ്: https://doi.org/10.1038/485033a

ആധുനിക മനുഷ്യരുടെ അങ്ങനെയുള്ളൊരു ചിത്രം ഇതിനുമുകളില്‍ ചേര്‍ക്കുന്നു. നേച്ചറില്‍ വന്ന ഒരു ലേഖനത്തില്‍ നിന്ന് എടുത്തിരിക്കുന്ന ഒരു ചിത്രമാണിത്.⁴ തലക്കെട്ട് ശ്രദ്ധിക്കുക, “വളഞ്ഞുപുളഞ്ഞ പാത"! (The Winding Path) മുകളില്‍ നിന്ന് താഴേക്ക് സമയം ഭൂതകാലത്തിലേക്ക് പോകുന്നു എന്ന നിലയ്ക്കാണ് ഈ ചിത്രം മനസിലാക്കേണ്ടത്. ഹോമോ ഹൈഡല്‍ബെര്‍ഗന്‍സിസ് (H. heidelbergensis) എന്ന വിഭാഗമാണ് നമ്മുടെ പൂര്‍വ്വികര്‍ എന്നും നിയാണ്ടര്‍ത്താലുകള്‍ നമ്മുടെ ജനിതക പൂളിന്റെ ഭാഗമായി ലയിക്കുന്നതും ഈ ചിത്രത്തില്‍ നിന്ന് വ്യക്തമാണല്ലോ? മാത്രമല്ല, ആധുനിക മനുഷ്യര്‍ മാത്രമല്ല, മറ്റ് സന്തതിവര്‍ഗങ്ങളും (daughter species) ഹോമോ ഇറക്ടസിന് (H. erectus) ഉണ്ടായിരുന്നതും, മനുഷ്യര്‍ ഉണ്ടായിരുന്നപ്പോഴും ഇറക്ടസിന് വംശനാശം വരാത്തതും ഇവിടെ വ്യക്തമാണ്.

എന്നിട്ടെന്തുകൊണ്ട് ഇക്കാര്യങ്ങളൊന്നും മനോരമ പരാമര്‍ശിക്കുന്നില്ല.? പരിണാമം എന്ന് കേള്‍ക്കുമ്പോള്‍ എന്തുകൊണ്ടോ ഈ ചിത്രമാണ് ഭൂരിഭാഗം മനുഷ്യരുടേയും മനസിലേക്ക് വരിക; സയന്‍സില്‍ ശ്രദ്ധിച്ച് അതില്‍ നിന്ന് കൂടുതല്‍ തിരുത്തുകള്‍ വരുത്താനോ കുട്ടികള്‍ക്ക് നല്ലൊരു ചിത്രം, ശരിയായ, അല്ലെങ്കില്‍ സത്യത്തോട് കൂടുതലടുത്തുനില്‍ക്കുന്ന, ധാരണകള്‍ നല്‍കാനും മാത്രം പണിയെടുക്കാനോ എന്തുകൊണ്ടോ മനോരമയുടെ എഴുത്തുകാര്‍ക്കും അതാവശ്യപ്പെടാനുള്ളത്ര സയന്‍സിനോടും സത്യത്തോടുമുള്ള ത്വര മനോരമ അധികൃതര്‍ക്കോ ഇല്ല എന്നതാണ് ഇവിടെ നമുക്ക് കാണാനാകുന്നത്. ദയനീയമായ സയന്‍സ് റിപ്പോര്‍ട്ടിംഗിന്റെ മറ്റൊരു തരത്തിലുള്ള ആവര്‍ത്തനം. തെറ്റിദ്ധാരണകള്‍ യാന്ത്രികമായി അടുത്ത തലമുറയ്ക്ക് കൈമാറുന്ന ദുരന്തം.

The Path to Homo Sapiens

ഈ ശ്രേണീ ബദ്ധമായ ചിത്രം ഒരു ക്ലാസിക് ചിത്രമാണ്. പുരോഗതിയുടെ പ്രയാണം അഥവാ "മാര്‍ച്ച് ഓഫ് പ്രോഗ്രസ്" (The March of Progress) അല്ലെങ്കില്‍ "ഹോമോ സാപ്പിയന്‍സിലേക്കുള്ള വഴി" (The Path to Homo Sapiens) എന്ന പേരില്‍ ലൈഫ് നേച്ചര്‍ ലൈബ്രറി പ്രസിദ്ധീകരിച്ച "പുരാതന മനുഷ്യര്‍" (Early Man) എന്ന വാല്യത്തില്‍ വന്നൊരു ചിത്രമാണ്.⁵ 1965-ല്‍! പരിണാമം ശ്രേണീബദ്ധമാണ് എന്ന ധാരണയുണ്ടാക്കിയതിനാല്‍ അന്ന് തന്നെ വ്യാപകമായി വിമര്‍ശിക്കപ്പെട്ട ഒരു ചിത്രമാണിത്.

അതിനൊപ്പമുള്ള എഴുത്തില്‍ അങ്ങനെയൊരു ശ്രേണീ ബദ്ധതയില്ല എന്ന് വ്യക്തമാക്കിയിരുന്നു എങ്കിലും, ചിത്രം നല്‍കുന്ന ആശയം ശക്തമായതിനാല്‍ ആളൂകള്‍ അതില്‍ തന്നെ കടിച്ചുതൂങ്ങുകയാണുണ്ടായത്.⁶ ഒരുപാട് പാരഡികളും ഒക്കെയായി ആ ചിത്രം ഒരു സജീവമായ മീമായി ഇന്നും നമ്മുടെ പരിണാമത്തിന്റെ ചിത്രത്തിന്റെ ഭാഗമായി കിടക്കുന്നു. പുരോഗതിയുടെ പ്രയാണം പരിണാമത്തിന്റെ തിരിച്ചറിവിന്റെ അധോഗതിയുടെ പരിണാമം കൂടിയായി കാണേണ്ടി വരും.

ഈ ചിത്രത്തെയാണ് ആധുനിക ധാരണകളെയെല്ലാം തള്ളിക്കളഞ്ഞ് അതേ ക്രമത്തില്‍, ഏതാണ്ട് അതേ തലക്കെട്ടില്‍ മനോരമ ആവര്‍ത്തിക്കുന്നത്! (മനോരമയുടെ സ്പീഷീസ് വര്‍ണ്ണനകള്‍ സായന്‍സികമാണോ എന്ന് പരിശോധിക്കാനുള്ള വൈദഗ്ധ്യം എനിക്കില്ലാതെ പോയി; പക്ഷേ അവ ശരിയാകാന്‍ ഒരു സാധ്യതയും ഞാന്‍ കാണുന്നില്ല) സയന്‍സിനോടുള്ള പൂര്‍ണ്ണമായ മുഖം തിരിക്കലായിട്ടല്ലാതെ ഇതിനെ കാണുക ബുദ്ധിമുട്ടാണ്.

ഡാര്‍വിനില്‍ നിന്നും നമ്മുടെ ജീവശാസ്ത്രം ഒരുപാട് മുന്നോട്ടു പോന്നിട്ടുണ്ട്. അങ്ങനെയുള്ളപ്പോള്‍, ഡാര്‍വിന്റെ കാഴ്ച്ചപ്പാടുകളില്‍ നിന്നുപോലും വസ്തുതാവിരുദ്ധമായ ഈ ചിത്രം, അതിന്റെ വ്യക്തമായ വിശദീകരണങ്ങളില്ലാതെ പരിണാമത്തിന്റെ സൂചകമായി ചേര്‍ക്കുന്നത് കുട്ടികളെ തെറ്റിദ്ധരിപ്പിക്കാനല്ലാതെ മറ്റൊന്നിനും ഉപകരിക്കില്ല.,

ദയവായി ഇത്തരം തെറ്റുകള്‍ കാണുമ്പോള്‍ തിരുത്തുക, തിരുത്തിക്കൊണ്ടേയിരിക്കുക. പരാമാവധി കുട്ടികള്‍ പരിണാമത്തിന്റെ യാഥാര്‍ത്ഥ്യം മനസിലാക്കേണ്ടതുണ്ട്. ഇത്തരം തെറ്റായ മീമുകളില്‍ കെട്ടിത്തൂങ്ങാതെ നമുക്ക് ഈ നൂറ്റാണ്ടിന്റെ സായന്‍സികാവബോധത്തിലേക്ക് ഒരുമിച്ച് നീങ്ങാന്‍ പരിശ്രമിക്കാം.

അവലംബം

1. https://en.wikipedia.org/wiki/Neanderthal
2. https://en.wikipedia.org/wiki/Human_taxonomy
3. https://en.wikipedia.org/wiki/Interbreeding_between_archaic_and_modern_humans
4. https://www.nature.com/articles/485033a
5. https://en.wikipedia.org/wiki/March_of_Progress
6. https://www.bostonglobe.com/ideas/2012/10/27/what-our-most-famous-evolutionary-cartoon-gets-wrong/drKMD5121W6EUxXJ4pF0YL/story.html